Nan kou sa a, mwen toujou kòmanse kou a avèk yon sondaj.
Nan sondaj la, sa m fè?
Mwen mande etidyan yo yon seri kesyon ki trè senp.
Mwen mande yo: ki laj yo, ki sa y ap etidye, nan ki ane yo ye, kote yo te fèt, ki kote yo te viv, ki lang yo pale.
Epi, an menm tan tou, m poze yo kesyon pou m konnen ki sa yo panse de kontni kou a, men, san ke nou pa poze yo kesyon ki konplike.
M mande yo, pa egzanp, ki sa yo konnen sou lang kreyòl yo.
M mande yo pou yo defini ki sa yon “lang kreyòl” ye.
M mande yo ki jan yo ta defini ki sa “idantite” vle di.
M mande yo a ki sa yo panse lè yo tande mo “Antiy”, mo “Karayib” - a ki sa yo panse.
Lè kon sa, m vin konnen plizoumwen ki sa yo gen nan tèt yo pa rapò avèk lang kreyòl, idantite, Karayib...
Epi m sèvi avèk sa kounye a pou m kòmanse kou a, pou m konnen kote yo ye, pou m ka konnen ki kote yo vle ale.
E kounye a, detanzantan, m fè yon ti tchèk avè yo pou m konnen kouman lide yo chanje pandan ke klas la ap evolye.
Ou wè?
Pou mwen se yon bon teknik paske nan fen kou a, kounye a, m ka mezire ki kote yo te ye nan kòmansman kou a epi ki kote yo rive ale, sitou sou diferan dimansyon ki enpòtan pou klas la.
Kou wè: Chapant lang kreyòl, istorik lang kreyòl, rapò ant lang epi idantite, rapò ant lang avèk edikasyon ak devlòpman.
Donk, se kon sa mwen mezire pwogrè timoun yo tou.
